Прп. Лазарь

Категория: Молитва

Тропарь мучеников
глас 4
Мученицы Твои, Господи,/ во страданиих своих венцы прияша нетленныя от Тебе, Бога нашего,/ имуще бо крепость Твою,/ мучителей низложиша,/ сокрушиша и демонов немощныя дерзости./ Тех молитвами// спаси души наша.

Кондак мучеников
глас 8
Лик мученический ясен, полк светоносен,/ сошед к нам разумно,/ Церковь днесь просветил есть чудными зарями./ Темже, празднующе честную память их,/ просим от Тебе, Спасе наш:/ тех молитвами от бед избави нас,// да поем Ти: аллилуия.

Тропарь преподобного Лазаря Галисийского
глас 8
Бденными молитвами,/ теченьми слезными столп омочил еси,/ и из глубины воздыханьми/ во сто трудов уплодоносил еси,/ и был еси пастырь, всем подая прощение,/ преподобне отче наш Лазаре:/ молися Христу Богу// спастися душам нашим.

Кондак преподобного Лазаря Галисийского
глас 4
Яко светильника превеликаго/ Церковь Христова славит тя/ с веселием псаломски,/ темже не престай моляся Христу// дати всем прегрешений прощение.

Тропарь мучеников Авкта и Тавриона
глас 4
Таврион славный и Авкт дивный, огневи противистася и всем инем казнем,/ молитвами возмогающа;/ та убо молением сердца похваляюще,/ верою пресвятую и честную память ею совершим,/ душам просвещение почерпающа.

Тропарь преподобного Кирилла Новоезерского (Новгородского) чудотворца
глас 8
Божиим Духом подвизаемь,/ слез твоих тучами изсохшее напоил еси,/ и безплотное в пустыни житие показал еси,/ и еже из глубины сердца бодренными молитвами и постом/ благодеяния труды уплодоносил еси,/ и вселенную всю просветил еси сиянием чудес твоих,/ отче наш Кирилле./ Моли Христа Бога, спастися душам нашим.

Тропарь на обретение мощей преподоного Кирилла Новоезерского (Новгородского)
глас 8
Яко светильник явился еси всесветел/ во отоце Нова езера на Красном острове,/ преподобне отче Кирилле,/ ты бо крест Христов на рамо взем,/ усердно Тому последовал еси,/ чистотою Богови приближився,/ от Негоже и силами чудес обогатися,/ тем и мы любезно прибегаем к раце честных мощей твоих, умильно глаголем:/ о, преподобне отче Кирилле!/ моли Христа Бога спастися душам нашим.

Кондак преподобного Кирилла Новоезерского (Новгородского) чудотворца
глас 8
Взбранному и крепкому адаманту,/ прогонителю бесов, новому чудотворцу/ победительная, страстей злых свободившеся,/ благодарственная восписуем ти, отче наш Кирилле./ Но яко имея дерзновение у престола Христова,/ верою чтущих тя, град же и люди, молитвою твоею сохраняй,/ ты бо еси стаду твоему похвала и утверждение.

Кондак на обретение мощей преподоного Кирилла Новоезерского
глас 2
Христов ярем на рамо взем,/ усердно Тому последова,/ чистотою Богови приближився,/ отче преподобне Кирилле,/ молим тя, посещай милостивно чад своих,/ и моли непрестанно о всех нас.