Свт. Герман

Категория: Молитва

Тропарь преподобного Варлаама Хутынского
глас 3
Иже на земли леганием,/ пощением же и бдением/ тело твое изнуряя, преподобне,/ вся плотская мудрования умертвил еси,/ и исцелений струя независтная явился еси/ верою притекающим к тебе, Варлааме отче наш,/ моли Христа Бога// спастися душам нашим.

другой тропарь преподобного Варлаама Хутынского
глас 8
Богодуховныя благодати исполнився/ и разжегся любовию Животворящия Троицы,/ млад явися Богу угождаяй,/ ревнуя святым отцем преподобным,/ великия труды возлюбив,/ и понесл еси, и демонския посрамив, множкества низложил еси,/ и преставися в вечный покой,/ и ныне подаеши просящим неоскудное исцеление,/ исцеляя многоразличныя недуги,/ молимтися, святый преподобне отче Варлааме,/ непрестанно молися ко Господу о душах наших.

Кондак преподобного Варлаама Хутынского
глас 8
Якоже другий Илия, отче, дождь с небесе свел еси,/ он убо огнь сведе и царя удиви,/ ты же люди твоя возвеселил еси и торжествовати устроил еси./ Великий бо Новград вельми тобою хвалится, имея мощи твоя в себе,/ Егоже сохраняй от враг непоколебима, да зовем ти:// радуйся, преподобне Варлааме, отче наш.

Тропарь святителя Павла
глас 3
Божественныя веры исповеданием/ другаго Павла тя Церковь, ревнителя во священницех, показа,/ свозопиет ти и Авель ко Господу,/ и 3ахариина кровь праведная./ Отче преподобне,/ Христа Бога моли// дароватися нам велией милости.

Кондак святителя Павла
глас 2
Облиставый на земли, яко звезда небосветлая,/ Кафолическую просвещаеши Церковь ныне,/ о нейже и страдальчествовал еси,/ душу твою, Павле, предложив,/ и, якоже 3ахариина и Авелева,// ясно вопиет твоя кровь ко Господу.

Тропарь преподобного Варлаама Керетскаго
глас 1
Божественною свыше просветився благодатию, преподобне,/ мир оставил еси,/ житейскую печаль и всяк мятеж мира сего/ любве ради Христовы со дерзновением отвергл еси,/ евангельски Христу последовал еси,/ и, Того ярем взем, во всем воли Его повинулся еси,/ и весь разум и сердце к Нему неуклонно возложил еси,/ Христа ради тело свое изнуряя постом и бдением, в молитвах своих не усыпая,/ Бога милостива творя и Пречистую Богородицу Молебницу предлагая,/ и сего ради от Бога восприем власть и силу на сопротивнаго врага,/ не убояся воздушныя и морския тяготы и студени, ниже уклонися,/ и морскою пучиною в мале ладиице по водам шествие творя,/ против зельнаго обуревания плаваше,/ промышлением Божественнаго разума направляем,/ и около Святаго Носа непроходимый путь морский/ от ядовитаго червия/ благопроходен человеком без вреда сотворил еси молитвами своими,/ и многим терпением во временней жизни подвиг совершил еси,/ и, равноангельное житие пожив,/ темже и по преставлении источаеши чудес благодать/ иже верою приходящим к тебе, Варлааме, преблаженне отче наш,/ вопием ти: моли Христа Бога,/ да спасет души наша.

Кондак преподобного Варлаама Керетскаго
глас 2
Все умное свое желание к Богу вперив,/ и Тому невозвратно от души последовал еси,/ и житейския молвы отринув,/ в молитвах, и слезах, и злостраданиих плоть свою изнуряя,/ добре подвизався противу невидимаго врага кознем,/ и, победив я, веселяся, прешел еси к Небесным чертогом,/ и ныне со Ангелы Святей Троице предстоя,/ отнюду же и Всевидящее око, твоя труды видев,/ даром чудес по преставлении обогатило тя есть,/ иже тебе с верою почитающим/ исцеление подаваеши невидимо/ и молишися непрестанно, сохраняя отечество свое и люди/ от враг видимых и невидимых ненаветны,/ да вси тебе вопием:/ преподобне отче наш Варлааме,/ моли непрестанно о всех нас.

Тропарь святителя Германа, архиепископа Казанского
глас 4
От юности иго Христово усердно восприим,/ бденными подвиги поста и молитвы прославился еси./ Отонудуже призывающу тя Богу на служение Церкви/ в новопросвещеннем царстве Казанстем,/ вкупе со святителем Гурием воззван был еси,/ идеже яко первоначальник/ созданной тобою в граде Свияжске обители/ и достойный первосвятителю преемник явился еси./ Духом предстоя Престолу Владычню,/ молися, святителю Германе, со святителем Гурием/ православной пастве во благочестии преспевати/ и тьме иноверия светом веры разгнатися.

другой тропарь святителя Германа, архиепископа Казанского
глас 4
Яко великим пастырем единонравна и учителем вселенныя единомысленна,/ Церкве Божия служителя усердна, и строителя тайн Христовых благоговейна,/ стекшеся благовернни людие Свияжския обители Богомудраго основателя/ и Казанский новопросвещенныя паствы святителя Германа/ песньми и пении восхвалим, глаголюще:/ не престаи присещати молитвами твоими на всю паству твою, в вере и благочестии блюди невредимо.

Кондак святителя Германа, архиепископа Казанского
глас 4
Доблестями преподобия и правды/ врученное тебе словесное стадо озаряя/ и на злачных Слова Христова пажитях питая,/ на правый путь заповедей Господних/ силою духа твоего наставлял еси е./ Темже и ныне, осеняемое цельбоносными чудотворении твоими,/ в святую память твою, зовем тебе:/ не престай, святителю, предстательствовати/ пред Пастыреначальником о стаде твоем,/ яко паствы твоей утверждение/ и сущим по тебе святителем удобрение.