Прп. Стефан

Категория: Молитва

Тропарь преподобного Стефана Савваита, творца канонов
глас 5
Воздержанием житие украси и страсти умертвив,/ посрамил еси вражия прилоги, отче Стефане,/ и преложися к Богу, чудотворец показася,/ в вечней славе со Ангелы ликуя,/ с ними же моли помиловати души нагла.

Кондак преподобного Стефана Савваита
глас 4
Насадил еси добродетелей рай/ и напоил еси токами слез твоих,/ яко жизни, всеславне, древо получив,/ спаси молитвами твоими от тли стадо твое,/ избави от обстояний тепле чтущих тя, Стефане,/ тя бо предстателя величайша, мудре,/ вси верою и любовию стяжахом.

Тропарь мучеников Терентия и Неонилы и чад их
глас 4
Мученицы Твои, Господи,/ во страданиих своих венцы прияша нетленныя от Тебе, Бога нашего:/ имуще бо крепость Твою,/ мучителей низложиша,/ сокрушиша и демонов немощныя дерзости,/ тех молитвами// спаси души наша.

Кондак мучеников Терентия и Неонилы и чад их
глас 4
Мученическая честная память прииде днесь,/ веселящи всяческая,/ Терентия премудраго и подружии его,/ тепле убо стецемся,/ да приимем исцеление,/ сии бо благодать приемше от Духа Святаго// исцеляти недуги и болезни душ наших.

Тропарь святителя Арсения, архиепископа Сербского
глас 8
Милости наставниче и благоутробия сокровище,/ еже всем отверзл еси,/ правоверия учителю и архиереев Божественное удобрение,/ отче наш, иерарше Арсение,/ нищих был еси заступник:/ тем моли Христа Бога,/ просветити души наша, да не когда уснем в смерть.

Кондак святителя Арсения, архиепископа Сербского
глас 2
В пищи словес твоих, Богоносе Арсение,/ разумно чада твоя питая,/ языком хваля, устнами же пение принося, вещанием зовый:/ Христе, Ты еси Свет неизреченный.