Акафисты

Категория: Акафист

Акафист Пресвятой Богородице перед Ея иконой, именуемой «Знамение» Новгородская

Акафисты


Кондак 1
Взбранной Воеводе, Владычице нашей Богородице, знамением иконы Ея святыя дивную победу людем Новаграда даровавшей, благодарственное возглашаем пение. Ты же, Всеблагая Заступнице наша, яко имущая державу непобедимую, от всяких нас бед свободи и от враг видимых и невидимых защити, да зовем Ти: Радуйся, Владычице, знамение милости Твоея нам являющая.

Икос 1
Ангелов Царице и всея твари Владычице, Пречистая Дево Богородице, преславным знамением иконы Твоея святыя всю страну Российскую благодатно озарила еси и струй чудес от нея источила еси верным. Темже, со усердием и любовию припадающе ко пречестному Твоему образу, со умилением приносим Ти благохваления сицевая: Радуйся, освященное селение Бога Слова; Радуйся, благодатию Божиею и нас освящающая. Радуйся, спасению падшаго рода человеческаго непорочно послужившая; Радуйся, всех Творца и Господа, Чистая, Духом Божественным в ложеснах заченши, без истления родившая. Радуйся, Матерним Твоим попечением всех нас объемлющая; Радуйся, в бедах и напастех скорая нам Помощнице. Радуйся, злыя страсти наша невидимо укрощающая; Радуйся, в христианских добродетелех преуспевати нам помогающая. Радуйся, недуги наша безмездно врачующая; Радуйся, на стези покаяния нас премудро наставляющая. Радуйся, Дево, христиан похвало; Радуйся, яко блажат Тя вси роди. Радуйся, Владычице, знамение милости Твоея нам являющая.

Кондак 2
Видев озлобление Новаграда, крепце воюемаго от воев суждальских, святитель Христов Иоанн слезно моляшеся о избавлении и спасении града и услыша Глас свыше, да идет во храм Преображения Господня и, взем тамо икону Пресвятыя Богородицы, да изнесет ю на забрала града противу полчищ, его воюющих. Таковое веление Божие услышав святитель благодарственно возопил Спасу Христу: Аллилуиа.

Икос 2
Разумев волю Божию во гласе Небеснем, святитель Христов Иоанн прииде ко храму Преображения Господня взяти икону Богоматере, и егда моляшеся пред нею, подвижеся икона от места своего на руце его честныя, и той с пением молебным изнесе ю на забрала града, глаголя народу: дерзайте, Мати о Бога нашего с нами есть. Сего ради, видевше Твое к ним благоволение, в пришествии чудеснем иконы Твоея явленное, в песнех возглашаем благохваления сицевая: Радуйся, Надежде христиан ненадежных; Радуйся, скорбящих Радосте и Заступление. Радуйся, безпомощным скорую помощь Твою являющая; Радуйся, утесняемым ослабу и свободу дарующая. Радуйся, православным воином Предводительница к победам; Радуйся, ратей неприятельских всекрепкое низложение. Радуйся, великий Новград благоволением Твоим осенившая; Радуйся, на забрала его, яко Взбранная Воевода, во иконе Твоей пришедшая. Радуйся, ненаказанных милостивая Наказательнице; Радуйся, неразумных премудрая Вразумительнице. Радуйся, обидящих всегрозная Устрашительнице; Радуйся, обидимых Всеблагая Заступнице. Радуйся, Владычице, знамение милости Твоея нам являющая.

Кондак 3
Силою Божиею укреплен, святитель Христов Иоанн вознесе святую икону Твою, Владычице Богородице, посреде самыя брани, идеже стрелы от сопротивных, яко дождь, падаху, и едина от них честный лик Твой на иконе устрели; абие же икона Твоя лик свой от полков враждебных отврати и слезы от очес источи, ихже собирая в фелонь свою, святитель Христов Иоанн народом дерзати повеле, они же, яко крепка некоего хранителя имуще, на сопротивныя устремишася и до конца победиша тех, зовуще Господу Сил: Аллилуиа.

Икос 3
Имеяше Тя воистину великий Новград Воительницу державную, Богородительнице Всеблагая, егда, паче надеяния, знамением иконы Твоея святыя победити сильным полки сопротивных людем Новаграда помогла еси. Темже, пение победное Тебе приносяще, взываем сице: Радуйся, умирение миру Святым Рождеством Твоим принесшая; Радуйся, средостение вражды древния разрушившая. Радуйся, неправедно враждующия наказующая; Радуйся, знаменьми и чудесы Твоими христолюбивыя люди утешающая. Радуйся, от стрелы вражия язву на лицы иконы Твоея приемшая; Радуйся, слезы благодатныя от нея дивно источившая. Радуйся, вой сопротивных слепотою и бегством поразившая; Радуйся, полки крепкия безсильны соделавшая. Радуйся, во бранех крепкая Помощнице; Радуйся, врагов посрамление. Радуйся, люди Твоя Дивною победою увенчавшая; Радуйся, Непобедимая Воеводо вождей и воинств христианских. Радуйся, Владычице, знамение милости Твоея нам являющая.

Кондак 4
Буря недоумения смущает ми ум: како возмогу недостойными усты воспети чудеса Твоя, Богомати Владычице, яже святою иконою знамения Твоего в Новеграде явила еси, даровав ю в помощь и заступление всем православным людем от враг видимых и невидимых? Темже, величающе неизчетныя милости Твоя к нам смиренномудренне воспеваем прославльшему Тя Сыну Твоему и Богу: Аллилуиа.

Икос 4
Слышавше о дивнем чудеси святыя иконы знамения Твоего в Новеграде, Пречистая Дево, како людие новоградстии, имуще сию, силою Твоею и пособием Божественнаго зрака Твоего преславное одоление на сопротивныя показаша, со благоговением и радостию поклоняемся сему чудному образу Твоему и хвалебне зовем Ти: Радуйся, Невесто Отца Безначальнаго; Радуйся, неискусобрачная Родительнице Превечнаго Слова. Радуйся, селение прекрасное Духа Святаго; Радуйся, Живоначальныя и Единосущныя Троицы благодатию осененная. Радуйся, древле пророки многообразне предреченная; Радуйся, Ангельския соборы чистотою Твоею превозшедшая. Радуйся, человеческаго рода возвышение; Радуйся, падших сынов Адамлих благодатное возстание. Радуйся, яко из Тебе в плоть облечеся одеваяй небо облаки; Радуйся, яко млеком Твоим питала еси Питателя вселенныя. Радуйся, Всеблагословенная Богородице, Чистая Приснодево; Радуйся, Радосте наша и спасение душ наших. Радуйся, Заступнице наша, от Бога нам дарованная; Радуйся, всех верных ограждение и священное прибежище. Радуйся, Владычице, знамение милости Твоея нам являющая.

Кондак 5
Богосветлая звезда — икона знамения Твоего, Богородице Дево, великий Новград сиянием многих чудес духовно просвети, неоскудно источающи благодатныя исцеления всем верным, со усердием к ней притекающим. Не лиши и нас благодатнаго Твоего озарения и милосердных щедрот Твоих боголепным поклонением чествующих чудотворную икону Твою, да благодарственно воспеваем Богу: Аллилуиа.

Икос 5
Видевше чудеса преславная, от иконы знамения Твоего бывшая, Владычице Преблагая, людие Новаграда со усердием к ней притекаху и в недузех своих исцеления благодатная от нея приемляху. К нейже ныне приходяще, поклоняемся, и чествуем, и от желания сердца целуем, исцелений благодать почерпающе, и недуг телесных, и душевных страстей свобождаемся, зовуще Ти и глаголюще: Радуйся, скорбящих Радосте и обидимых Заступнице; Радуйся, печальных Утешение и бедствующих помощнице. Радуйся, болящих немздоприимная Целительнице; Радуйся, нищих и убогих некрадомое богатство. Радуйся, терпеливых страдальцев дарами благодатными ущедряющая; Радуйся, отчаянных и безнадежных от рова погибели избавляющая. Радуйся, вдовиц и сирых благосердая Попечительнице; Радуйся, целомудрия и воздержания юных Наставнице. Радуйся, старцев благоговейных сладкое Успокоение; Радуйся, стариц боголюбивых тихое Прибежище. Радуйся, кающихся грешников верная Споручнице; Радуйся, даров духовных щедрая Подательнице. Радуйся, Владычице, знамение милости Твоея нам являющая.

Кондак 6
Проповедует Новград преславное заступление Твое, Пречистая Владычице, како во дни нашествия врагов сильных и вооруженных от святыя иконы знамения Твоего помощь Твою благодатную людем Твоим даровала еси, враждебныя полки со студом вспять обратила еси, град же Твой цел и невредим от них сохраньши, да вси поют Спасителю Богу: Аллилуиа.

Икос 6
Возсияла еси лучами великих чудес в Новеграде, Богородице Дево, и икону знамения Твоего благодатным источением слез дивно прославила еси, неизчетныя милости от нея щедро подавающи всем скорбящим, и обремененным. Посети убо и души наша, недугующия страстьми греховными, Госпоже Всеблагая, и буди нам Помощница во спасение, да благодарственно Тебе зовем: Радуйся, Молитвеннице благоприятная за нас к Богу; Радуйся, Предстательнице всемощная, гнев Божий на милость прелагающая. Радуйся, руце Твои богоносне на умоление ко Творцу выну простирающая; Радуйся, яко Мати Сына, Судию Праведнаго, о всем мире умоляющая. Радуйся, покровом Матерняго Твоего заступления всех нас покрывающая. Радуйся, сущих в бедах и скорбех благодатию смирения и терпения снабдевающая. Радуйся, страждущия и безпомощныя невидимо укрепляющая; Радуйся, болящия и безнадежныя от одра болезни возставляющая. Радуйся, верою молящимся Тебе великия милости являющая; Радуйся, во благих прошения наша дивно исполняющая. Радуйся, струи благодатных исцелений обильно нам источающая; Радуйся, всем вся полезная дарующая. Радуйся, Владычице, знамение милости Твоея нам являющая.

Кондак 7
Хотящи явити, Владычице, не токмо великому Новуграду, но и всему православному Российскому жительству преславныя чудеса Твоя от иконы знамения Твоего, сию во многих градех, обителех и весех от лет древних до дний наших дивными чудесы прославила еси: слепым прозрение, разслабленным укрепление и многим болящим исцеление милостивно от нея дарующи и сим подвизающи люди величати Тя, возвеличившую род наш, и пети Христу Богу: Аллилуиа.

Икос 7
Новград и всю землю Российскую дивная икона знамения Твоего, Богородице Дево, чудесы благодатными осия, милости Твоя богатыя верным проявивши. Сию убо боголепным поклоненим чествующе, хвалебне Тебе, Владычице, взываем: Радуйся, скоропредстательная Помощнице усердно к Тебе притекающих; Радуйся, благосердая Услышательнице молений наших. Радуйся, великий Новград благословением Твоим осенившая; Радуйся, в пределех его икону Знамения Твоего чудесы прославльшая. Радуйся, дев ликостояния прославлением иконы Твоея духовно возвеселившая; Радуйся, всесильными Твоими к Богу молитвами и нас ко блаженству райскому возводя. Радуйся, за всех нас милостивая к Сыну Твоему и Богу Ходатаице; Радуйся, ведущим брань противу мира, плоти и диавола добрая Споспешнице. Радуйся, вся страны православныя покровом милости Твоея осеняющая; Радуйся, многих мест и обителей сокровище исцелений неоскудное. Радуйся, иноков и инокинь благоподвизающихся всемощная Покровительнице; Радуйся, и в миру благочестно живущих усердная Заступнице. Радуйся, Владычице, знамение милости Твоея нам являющая.

Кондак 8
Странствующе в юдоли сей земней, многоскорбней и многомятежней, горняго града — Иерусалима Небеснаго взыскуем и Тебе, Владычице, молим: путеводствуй нам по стези заповедий Христовых и сохрани нас от падений греховных, удиви на нас милость Твою и осени нас Твоим заступлением, да, Твоею помощию спасаеми, сподобимся купно со всеми святыми воспевати: Аллилуиа.

Икос 8
Всех скорбящих Утешительнице и бедствующих Помощнице, Всеблагая Богородительнице, презри нас, припадающих к Тебе пред пречистым образом Твоим, но посети нас милостивно щедротами Твоими: и, якоже древле отцем нашим помощь Твою державную явила еси, тако и нас, смиренных, не лиши Твоего заступления во время благопотребно, да не постыдимся во уповании нашем, еже по Бозе крепко на Тя возлагаем, и зовем Ти: Радуйся, Богосветлая свеще, светом Христовым озаряющая верныя души; Радуйся, многоценный алавастр, миром Божия благодати умащаяй боголюбивыя сердца. Радуйся, умнаго Солнца Мати верныя просвещающаго, неверныя же помрачающаго; Радуйся, славо небесных и упование земных. Радуйся, Надеждо наша и Заступнице всех притекающих к Тебе с верою; Радуйся, любящия и чтущия Тя от всяких бед избавляющая. Радуйся, обетовании благими души верных благодатно веселящая; Радуйся, девственных ликов славо и похвало. Радуйся, подвижников благочестия к горнему Сиону путеводствующая; Радуйся, верных к Небесному Иерусалиму приводящая. Радуйся, омраченныя сердца светом истиннаго боговедения просвещающая; Радуйся, и всех нас благодатными лучами великия Своея милости покрывающая. Радуйся, Владычице, знамение милости Твоея нам являющая.

Кондак 9
Все ангельския воинства благоговейно Тебе служат, Небесе и земли Царице, человеческий же род немолчныя хвалы Тебе приносит, горних и дольных Владычице, и Твою святую икону поклонением досточестным почитает. Сию бо во отраду и утешение нам даровала еси, Всеблагая, и знамения Матерния любве Твоея оною нам присно являеши, да поем Тобою благодеющему нам Богу: Аллилуиа.

Икос 9
Ветии суемудреннии человечестии не могут постигнути Божественную тайну приснодевства Твоего, Марие Богородице, како в рождестве и по рождестве ключи девства Твоего целы сохранила еси, ангелов и человеков удививши. Темже Тя благочестно Матерь и Деву исповедующе, присно Тя ублажаем и хвалебно Тебе воспеваем: Радуйся, возвеличившая род человеческий непорочною Твоею чистотою; Радуйся, освятившая землю всесвятым Твоим рождеством. Радуйся, девство и рождество в Себе дивно сочетавшая; Радуйся, во обою непорочно Себе сохраньшая. Радуйся, велие вселенныя чудо; Радуйся, непостижимая человеческими умы тайно. Радуйся, ангельских ликов удивление; Радуйся, святых Божиих угодников присное радование. Радуйся, мира горняго первейшее украшение; Радуйся, мира дольняго благонадежное заступление. Радуйся, демонов низложение; Радуйся, ада попрание. Радуйся, Владычице, знамение милости Твоея нам являющая.

Кондак 10
Спасителя падшему человечеству родила еси, Пречистая Дево, и Сего яко Младенца во объятиих Твоих носила еси, Егоже Божественное изображение и на иконе знамения Твоего нам являеши и многия милости и щедроты Твоя нам даруеши. Сего ради со благоговением и верою чествуем образ чудотворный Твой, Владычице, и молимся Тебе прилежно: буди нам Покров и защита в день Судный, да Твоим Матерним предстательством помилует нас Судия Праведный, Сын Твой и Бог, и сподобит нас деснаго стояния и пения Ему со избранными: Аллилуиа.

Икос 10
Стена необоримая и источник чудес икона Твоя святая явися, Богородице Дево, не токмо великому Новуграду, но и всей стране Российстей. Сию, яко знамение победное, имуще, воинства православныя врагов побеждают, и святителие ею благоукрашаются, и всяк возраст верных утешение благодатное от нея приемлет. Утеши и нас Твоим, Всемилостивая Владычице, благоволением и милостию, да хвалебно взываем к Тебе: Радуйся, крепкое наше Упование; Радуйся, несумненная наша Надеждо. Радуйся, великаго Новаграда многопетая славо; Радуйся, страны нашея благодатное ограждение. Радуйся, во дни брани победительная на враги Помощнице; Радуйся, во дни мира ко благочестию добрая Наставнице. Радуйся, иноческих обителей покров и снабдение; Радуйся, благочестивых домов и супружеств благословение. Радуйся, девства и чистоты Поборнице; Радуйся, обидимых и гонимых Предстательнице. Радуйся, нагих одеяние; Радуйся, болящих исцеление. Радуйся, Владычице, знамение милости Твоея нам являющая.

Кондак 11
Пение наше смиренное не презри, всемилостивая Царице, и утробу щедрот Твоих не затвори нам, всещедрая Владычице: се бо, обнищавше в добрых делех, к сокровищнице милости Твоея, чудотворней иконе Твоей, со усердием притекаем, Всеблагая, и, припадающе, молимся: озари нас светом Божественныя благодати Твоея и научи нас верно исполняти заповеди Сына Твоего и Бога, да достойно возможем пети Ему: Аллилуиа.

Икос 11
Света невечерняго приятелище, светлыми лучами чудес Твоих просвещаеши нас, помраченных греховною мглою, Богородительнице Пречистая, и приводиши к немолчному славословию Твоего Пресвятаго имене. Знамением иконы Твоея святыя воистинну явила еси воеводство Твое державное, Госпоже Всеблагая, егоже светло празднующе, радостно зовем Ти: Радуйся, возвеличенная Богом паче земных и небесных; Радуйся, едина Чистая и Благословенная в женах. Радуйся, Царице и Владычице небесе и земли; Радуйся, порфиро Царя царей. Радуйся, чертоже безсеменнаго уневещения; Радуйся, главизно спасения человеческаго. Радуйся, уповающия на Тя несрамляющая; Радуйся, просящия Твоея святыя помощи от бед избавляющая. Радуйся, столпе и утверждение девства; Радуйся, щите и ограждение веры православныя. Радуйся, боголепное украшение Святыя Христовы Церкве; Радуйся, покрывающая всех нас Матерним Твоим покровом. Радуйся, Владычице, знамение милости Твоея нам являющая.

Кондак 12
Благодать и милость Свыше подаждь нам, Владычице, от иконы Твоея святыя, юже в знамение заступления Твоего нам даровала еси, чудесы, от нея бывающими, православную веру в нас утверждающи, неверие же посрамляющи. Темже поклоняемся Тебе и молимся: в Православии соблюди нас, Всеблагая, и сподоби до конечнаго дыхания нашего верно пети Богу: Аллилуиа.

Икос 12
Поюще чудеса Твоя от иконы знамения Твоего явленная, Богородице Дево, хвалим, славим и величаем Тя, Честнейшую воистину Херувим и Славнейшую без сравнения Серафим. Ты же, Всеблагая Заступнице наша, покрый нас державным Твоим покровом и избави нас от всяких бед и искушений вражиих, да воспеваем Тебе непрестанно гласом хваления: Радуйся, Богообрадованная и непорочная Приснодево; Радуйся, нетленная и неискусобрачная Агнца и Пастыря Мати. Радуйся, увенчанная диадимою царскою от Триединаго Бога; Радуйся, святолепная и светоносная палато святых Святейшаго Слова. Радуйся, одесную стоящая Сына Твоего и Господа; Радуйся, всегда молящаяся Ему за род христианский. Радуйся, Виновнице благодатнаго человеков обновления; Радуйся, кающихся грешных к Богу примирение. Радуйся, страждущих от бед Избавление; радуйся, Взыскание погибших. Радуйся, телес наших врачевание; Радуйся, душ наших спасение. Радуйся, Владычице, знамение милости Твоея нам являющая.

Кондак 13
О Всепетая Мати Сладчайшаго Спасителя нашего, Господа Иисуса Христа! Нынешнее наше приемши приношение, от всякия избави нас напасти и скорби, и вечныя изми муки всех пред святою иконою Твоею с верою и любовию поклоняющихся и о Тебе благодарно зовущих Богу: Аллилуиа.

(Этот кондак читается трижды, затем икос 1 и кондак 1)

Тропарь глас 4
Яко необоримую стену и источник чудес/ стяжавше Тя, раби Твои,/ Богородице Пречистая,/ сопротивных ополчения низлагаем./ Темже молим Тя:/ мир граду Твоему даруй// и душам нашим велию милость.

Кондак глас 4
Честнаго образа Твоего знамение/ празднующе людие Твои, Богородительнице,/ имже дивную победу на сопротивныя граду Твоему даровала еси,/ темже Тебе верою взываем:// радуйся, Дево, христиан похвало.

Молитва
О Пресвятая и Преблагословенная Мати Сладчайшаго Господа нашего Иисуса Христа! Припадаем и поклоняемся Тебе пред святою чудотворною иконою Твоею, воспоминающе дивное знамение Твоего заступления, великому Новуграду от нея явленное во дни ратнаго на сей град нашествия. Смиренно молим Тя, Всесильная рода нашего Заступнице: якоже древле отцем нашим на помощь ускорила еси, тако и ныне нас, немощных и грешных, сподоби Твоего Матерняго заступления и благопопечения. Спаси и сохрани, Владычице, под кровом милости Твоея Церковь Святую, град Твой, всю страну нашу православную и всех нас, припадающих к Тебе с верою и любовию умиленно просящих со слезами Твоего заступления. Ей, Госпоже Всемилостивая! Умилосердися на ны, обуреваемыя грехи многими, простри ко Христу Господу Богоприимныя руце Твоя и предстательствуй за нас пред благостию Его, просящи нам прощения прегрешений наших, благочестнаго мирнаго жития, благия хри-стианския кончины и добраго ответа на Страшнем Суде Его, да, спасаеми всесильными Твоими к Нему молитвами, блаженство райское унаследуем и со всеми святыми воспоем Пречестное и Великолепое Имя Достопоклоняемыя Троицы, Отца и Сына и Святаго Духа, и Твое велие к нам милосердие во веки веков. Аминь.

Акафист Пресвятой Богородице перед Ея иконой, именуемой «Знамение» Корчемная

Акафисты


Кондак 1
Взбранной Воеводе Победительная, Царице Небесе и земли, похвальная песнопения приносим Ти, Богородительнице, Ты же, яко имущая державу непобедимую, от всяких зол сохрани нас и град наш, да зовем Ти: Радуйся, Благодатная, Господь о Тобою, Ты же с нами, чудным образом милость Божию знаменающая.

Икос 1
Архангели и Ангели и все воинство сил безплотных немолчно славословят и служат Ти, главы своя преклоняя: мы же грешнии недоумеем, откуда начнем восхваляти Тя по достоянию, обаче дерзая на благосердие Твое, приносим Ти похвалы сия: Радуйся, Рождеством Твоим мир горний с дольним возсоединившая; Радуйся, младая Отроковице, по ступенем храма никимже держимая возшедшая. Радуйся, по обетованию родителей Твоих в храме Иерусалимстем воспитанная; Радуйся, Духом Святым введенная во Святая Святых. Радуйся, в храме Господни молитве и Богомыслию наученная; Радуйся, тамо пищу из рук Архангельстих принимавшая. Радуйся, яко житие Твое при храме прообразом жития иноческаго явися; Радуйся, всех скорбящих скорое утешение. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 2
Видевши, Пресвятая Дево, немощи человеческаго естества, простре руку помощи вдовице некоей, пагубною страстию одержимей, яже вдаде благословенную икону свою «Знамения» в корчемницу вина ради, вся убо расточи имения своя. Не по мнозех же днех, в себе пришедши, собравши пенязи на выкуп, принесе икону в дом свой; наутрие же не нашедши Ю в доме своем, тече паки в корчемницу и обрет икону свою, чудесно перенесенную, паде пред Нею, поя Богу: Аллилуиа.

Икос 2
Разумевающи чудесное пренесение иконы Твоея, Пречистая Дево, невидимыма рукама в корчемнице поставленныя, вдовица отягчена сущи стыдом и жалостию, нача прилежно молитися со слезами: «Владычице, не лиши мя Покрова Твоего и милости!» Сице и мы хвалу Тебе приносим: Радуйся, чудесно тайне воплощения Сына Божия послужившая; Радуйся, первее Его повившая и во яслех безсловесных овец положившая. Радуйся, первее поклонение Сыну Твоему и Богу совершившая; Радуйся, млеком питавшая Питателя алчущих хлеба вечнаго. Радуйся, водою напоившая Подателя воды живыя, текущия в жизнь вечную; Радуйся, одеждою покрывавшая одевающаго небо облаки. Радуйся, иноков и инокинь Боголюбивых сладкая Отрадо; Радуйся, болящих и убогих совершенная цельбо. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 3
Силою Твоей многомощной молитвы обрати на путь покаяния и нас, имущих слабую волю удобопреклонную греху, яко паче жены тоя согрешаем ежечасно пред Сыном Твоим и Богом. Не тщимся воспрянути от сна греховнаго, и не разумеваем, како жизнь наша преходит, яко день вчерашний, иже мимо иде, но яви нам милосердие Твое, еже с надеждой вопити Тебе: Аллилуиа.

Икос 3
Имущи милосердие неоскудеваемое, Ты, Благая Мати, простираеши руце Свои на умоление за всех скорбящих и недугующих и самым отчаянным помощь подаеши, яко непрестанно молиши Сына Твоего Возлюбленнаго не токмо простити нас, но и даровати нам обитель в Царствии славы, якоже Сам речет: «В дому Отца Моего обители многи суть». Да прославим Тя, богатую в милости: Радуйся, кладезю неисчерпаемый дивнаго милосердия Твоего к миру скорбному; Радуйся, хитон нешвенный Сыну Твоему исткавшая, о нем же воини у Креста Его меташа жребий. Радуйся, двери милосердия Твоего нам отверзающая; Радуйся, во объятия Своя приявшая Объемлющаго весь мир. Радуйся, на руку Сына Твоего вознесенная к Великому Престолу; Радуйся, в уверение о близком Успении Твоем рая вравие с неба Архангелом принесенное, дивному Иоанну показавшая. Радуйся, Вселюбивая Мати наша, любовию Своею нас, труждающихся и обремененых, покрывающая; Радуйся, обетованием Святаго Духа купно с Апостолы обрадованная. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 4
Недоумеет ум наш, како прославити чудо милости Твоея ко вдовице, юже обратила еси к покаянию и даде ей непрестанно память имети о гресе своем. О, Мати Милосердия, помози и нам имети память о гресех наших и николиже забывати о часе смертнем, о часе, иже не минует ни едино создание на земли живущее. Како предстанем Сыну Твоему, како отвещаем Судии Праведнейшему? Аще не обратимся к покаянию и предстательством Твоим умолим Бога, поюще песнь: Аллилуиа.

Икос 4
Слышавше о дивном пренесении иконы и о чудесах, от Нея бываемых, вси жители града Рязани начаша от того часа поклонение творити честному образу Твоему и «Знамение» Корчемныя нарицати, якоже не возгнушалася еси в корчемнице явитися, лепту приношаху на удержание пред Нею лампады неугасимыя. Моли, Пресвятая Дево, Предвечнаго Бога, да не угаснет в сердцах наших огнь любве Божественныя, да с любовию восхвалим Тя: Радуйся, восхождением Своим по ступенем храма Иерусалимскаго научающая нас добродетельми, яко лествицею, восходити к совершенству; Радуйся, яко Ангели удивишася вхождению Твоему во Святая Святых. Радуйся, яко у Креста Сына Твоего чашу страданий до конца испившая; Радуйся, семикратными глаголы Сына Твоего со Креста, аки семью стрелами в сердце пронзенная. Радуйся, матерем чадородящим скорое вспоможение; Радуйся, явлением Святыя иконы Твоея град Рязань благословившая и всех нас возвеселившая. Радуйся, отчаянных и безнадежных к тихой и безмятежной жизни приводящая; Радуйся, плачущих матерей великое утешение, яко и Сама у Креста Сына Твоего: «Увы Мне, Свете Мой», рыдавшая. Радуйся, Благодатная, Господь с Тобою, Ты же с нами чудным образом милость Божию знаменающая.

Кондак 5
Богоразумный глас от иконы Твоея бываемый обратил есть на путь правый человека некоего, емуже прилучися быти во граде нашем, и прежде всех дел поклонение сотворшу Пречистому образу «Знамения»; явися бо ему в сонном видении образ сей, и кроткий глас Твой вещаше от Него: «Се Аз приидох к тебе, понеже посетил Мя еси и обратился еси от скверны», и обеща вспоможение в устроении дел его. О, Царице многомилостивая, дай и нам не познати гнева Твоего за безчестие наше, но услышати всепрощающий глас Твой, Богу же воспети: Аллилуиа.

Икос 5
Узрев сие дивное Твое промышление о грешнице, человек той хотяй встати на путь нечестия, воспрянув от дремания, абие же тече к пресвитеру церкви Преподобнаго Симеона и моляще его, да сотворит благодарственное молебное пение в храмине, идеже бысть ему явление Твое, многажды повергаяся ниц, моляше всех пети: «О, Всепетая Мати!» Мы же ни единою токмо, но многочастне получая помощь Твою, благодаряще хвалу приносим: Радуйся, от пути нечестия внезапно верных отводящая; Радуйся, скорби и радости земной жизни с Сыном Твоим разделившая. Радуйся, Архангельское благовестие со смирением принявшая и нас тем смирению научающая; Радуйся, Слово Божие во храме возлюбившая и исполнившая, яко таковии Сыном Твоим блаженнейшыя нарицаются. Радуйся, иноков Богомудрых ко спасению незримая руководительнице; Радуйся, веры православныя надежная оградо и утверждение. Радуйся, всех отринутых и уничиженных правое возведение; Радуйся, корень девства и цвете чистоты. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 6
Проповедует вся вселенная чудныя милости от икон Твоих чудотворных являемыя, воспоминаем и мы, како дивно спасла сей град Рязань от всегубительныя болезни, егда людие страхом внезапныя смерти одержимии притекоша с верою и надеждою к иконе Твоей, с пением обносяще Ю окрест домов своих. И оправдана бысть вера их в милосердный Покров Твой, ибо ни единому бысть умерети от болезни тоя из домов тех, да в радости сердца воспеша людие Богу Спасителю: Аллилуиа.

Икос 6
Возсия благодать от цельбоносныя иконы Твоея «Знамение», пред Нею же и мы преклоняем колена и сердца наша, и со слезами благодарим, како избавила еси толико людей от наглыя смерти. Избави нас, Пречудная Владычице, от смерти без покаяния и умоли Спасителя, да в час кончины нашея не лишит нас причащения Пречистых Своих Тайн Тела и Крове. Ей, Мати Божия, умоли! Да с верою и любовию во уповании зовем Ти: Радуйся, Мати Света незримаго; Радуйся, тайных подвижников поры и благочестия, среди мира живущих, непрестанная Помощнице. Радуйся, Сама им благословение на молитву и подвиги подающая; Радуйся, к трудолюбию и милосердию верных рабов Твоих направляющая. Радуйся, в сониих и видениих избранныя Своя посещающая; Радуйся, заповедей Господних первая Исполнительнице. Радуйся, всем любящим и чтущим Тя жизни вечныя сподобляющая; Радуйся, безпомощных сирот и вдовиц присная Охранительнице. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 7
Хотя явити дивное милосердие от иконы Твоея, Ты, Милостивая, егда в годину пагубныя болезни велий бысть зной воздуха, яко и земля изсохше и былие возгореся от палящаго солнца, возгореся огнь велий в бору близ града Рязани. Ты же, по молитве человека некоего, умом и сердцем пред иконою Твоею «Знамение» стояти мнящася, чудесно угасила огнь велий и землю одождила еси преизобильно. Прославляюще Бога, дивную песнь воспеваем Ему: Аллилуиа.

Икос 7
Дивно Ты угасила еси пламень горящий, близ града нашего. О, Пречистая Дево! Единая нам надеждо и утешение! Молим Тя: угаси пламень страстей наших, помози нам стяжати блаженное безстрастие, зане создани есмы по образу Божию и малым чим умалени от Ангел, но в забвении предаемся безпечности и страстем нашим. Тебе же с любовию хвалу поем: Радуйся, одесную Сына у Престола Его стоящая; Радуйся, песнь Ангелов: «Слава в вышних Богу» первее услышавшая. Радуйся, ублажаемая от всех родов по реченному Тобою; Радуйся, яко душа Твоя величит Господа. Радуйся, воспоминающи страдания Сына Своего много дней жизни Своей на Голгофе провождавшая; Радуйся, Чаше многоценная, до края исполненная Божественныя благодати. Радуйся, от помышлений суетных ум наш очищающая; Радуйся, кающихся грешников молитвы Сама к Богу приносящая. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 8
Странно бысть чудо Твое, егда человек некий, имея нозе свои одержиме лютым недугом, видом багряне и в язвах сущи, никиими же врачи спасен бысть, пришел к иконе Твоей, моля Скорую Помощницу в скорбех, и получив совершенное исцеление, паде ниц благодаряще. Исцели, Целительнице Благая, и наши душевныя и телесныя немощи, нас поющих немолчно песнь Богу: Аллилуиа.

Икос 8
Вся возможна Тебе суть, Пречистая, яко Ты еси Мати Единаго от Святыя Троицы, покрый нас Покровом милости Твоея, умоли о нас Сына Твоего, да продлено будет время жизни нашея на покаяние, да остающиися дни до кончины нашея поживем в чистоте, целомудрии и творении дел милосердия, яко да услышим сладкий глас Его, призывающий благословенных наследовати Царствие Божие, Тебе же со умилением зовем: Радуйся, хладныя души к познанию истины путьми неисследимыми приводящая; Радуйся, величием, яко венцем, увенчанная от Святыя Троицы. Радуйся, Премилостивая, с высоты славы Твоея земнородных не презирающая: Радуйся, заповедей Божиих искусни делателе нас являющая. Радуйся, в час кончины нашея духов тьма далече от нас отгоняющая; Радуйся, чистоту веры Христовы, яко драгую жемчужину, сохраняти Церкви нашей помогающая. Радуйся, мрачныя души человеческия Светом Божественныя благодати внезапно озаряющая; Радуйся, всем, близ потопления сущим, якорь спасения подающая. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 9
Все упование наше возложим на Тя, Преблагословенная Богородице, молим Тя: простри Свои Пречистеи руце на умоление к Сыну Твоему и Богу нашему; буди Споручница нам, грешным, окажи нам милость, зде на земли живущим; наипаче же тамо, в стране дальней, идеже несть печаль, ни воздыхание, но Ангельские лики поют непрестанно Божественную песнь: Аллилуиа.

Икос 9
Ветии многоглаголивыя умолкоша, такожде и силы горния преклониша главы своя пред Славою Твоею, яко Ты еси Царица небесе и земли, обаче с высоты славы Ты и земных не оставляеши, якоже и жену некую, скорбь о умершей дщери своей имущу и от лютыя болезни ног страдавшу, егда бо жена сия повеле нести ея в часовню к Пречудней иконе Твоей и зде по слезней молитве получивши совершенное здравие телесное и покой душевный, прослави Тя, Милостивую Целительницу. Темже и мы похваляем Тя сице: Радуйся, Славу Божию непрестанно зрящая; Радуйся, в горнем Всесвятлем Иерусалиме сонмом Ангелов окружаемая. Радуйся, неизмеримая Глубине любве Божественныя; Радуйся, до окончания земной жизни Своея посещавшая святый Гроб Сына Твоего и тем научающая нас память имети о могилах присных нам. Радуйся, с Сыном на Голгофе спострадавшая, по реченному старцем Симеоном: «Тебе же Самой оружие пройдет душу». Радуйся, в мори житейстем бедствие терпящим руку простирающая, якоже Сын Твой Петрови. Радуйся, яко Тя вся тварь Божественными песньми величает; Радуйся, кротких и нищих духом скорое услышание. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 10
Спасти хотя человечество от вечныя смерти, Господь наш Иисус Христос, воплотившийся от Пренепорочныя Девы Марии, даде нам Матерь Свою в покров и защищение, усыновив Ей с Креста весь род человеческий. Ты же, яко мост крепкий, приводяй нас от земли на небо, с любовию помогаеши всем прибегающим к Тебе, никто же бо отходит от Тебе не услышан, аще просит полезное и Богу поет: Аллилуиа.

Икос 10
Стено необоримая всем людем, искупленным Пречистою Кровию Сына Твоего, Ты еси, Чистая, Едина наша надеждо, Едино прибежище. Кто слезы наши отрет? Кто даст мир смущенней душе нашей, аще не Ты, Единая всем нам Мати? Да с любовию хвалу Тебе воспеваем: Радуйся, лучезарная заре веры Христовы; Радуйся, от Херувим и Серафим немолчмо воспеваемая. Радуйся, в доме Апостола Иоанна в смирении и кротости пожившая; Радуйся, за посещение Голгофы и святаго Гроба по воскресении Сына Своего от иудей гонимая. Радуйся, яко Благаго Царя Благая Мати нарицаешися; Радуйся, слезы скорбных отирающая рукою милосердною. Радуйся, яко о Тебе радуется Ангельский собор и человеческий род; Радуйся, Святыя иконы Своя в залог любве Своея вечныя на земли нам оставившая. Радуйся, и во граде нашем икону Свою явившая. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 11
Пение хвалебное приносим Ти, Пречистая Дево, и молим Тя: исцели неисцельныя наша болезни душевныя и телесныя, помози нам возстати из тины греховныя, научи нас исполняти вся заповеди Господни, да имамы дерзновение в молитвах наших, и Ты, Милостивая Заступнице наша, приклони ухо Твое к мольбам нашим, да якоже благонравнии раби Твои Божественному Сыну Твоему воспоем: Аллилуиа.

Икос 11
Светозарная икона Твоя «Знамение», издревле преносима бысть из часовни в храм, в понедельник Светлыя седмицы, яко же первое воспоется пред иконою Твоею Ангельское приветствие: «Чистая Дево, Радуйся! Твой Сын воскресе тредневен от гроба!» И сим убо священнодействием начинася молебное пение в приходских домех. Темже и мы, воспоминая сие, радостно славим Тя: Радуйся и красуйся, Чистая, о востании Рождества Твоего; Радуйся, Пресвятая Мати, яко воскресе Сын Твой, да наша души совоскресит с Собою. Радуйся, яко по святому преданию Ты, Пресвятая, Учительница была еси отроку Сыну Твоему; Радуйся, яко странно бе учение сие Сына Всеведущаго и Вездесущаго. Радуйся, Лазаря четверодневнаго, епископа острова Кипра, посещением Своим обрадовавшая; Радуйся, попечением и молитвами Твоими земную Церковь умножившая. Радуйся, изнемогающих от искушений духа и плоти нас десницею Своею избавляющая; Радуйся, в смирении и терпении живущим путь в Царствие небесное указующая и двери рая отверзающая. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 12
Благодать восхотев даровати пастве Своей от цельбоносныя иконы Твоея «Знамение», Боголюбивейший святитель града Рязани Гавриил, в смирении и кротости житие свое провождаше, яко и повествуется о нем, повеле изнести с честью икону Твою из корчемницы и соорудив часовню каменную при храме Преподобнаго Симеона Столпника, в поклонении всех мимоходящих постави Ю, да прославляют Тя вси, Пречудная Царице, и Сыну Твоему поют: Аллилуиа.

Икос 12
Поюще Твоя милости и чудеса, даже до ныне являемый верным рабом Твоим, поклоняемся предивному образу Твоему, явленному во граде Рязани, яко Тебе Самой, и молим Тя со слезами: научи нас, что сотворим, да угодны будем Тебе и Богу. Мы, не имущии не токмо дел, но и словес благих, чим воздадим Тебе за вся благодеяния Твоя? Но надеясь на милость Твою, славим Тя со умилением: Радуйся, в страданиих за Христа мучеников укрепляющая и дух преподобных возвеселяющая; Радуйся, святому праведному Иосифу в послушании послужившая. Радуйся, богатая милостию, в доме Обручника труды и обстояния ради святаго семейства Своего понесшая; Радуйся, странным рождеством Сына Твоего пред всеми матерьми возвеличенная. Радуйся, небесе с землею примирение; Радуйся, Всесветлая Звездо, сиянием Всечистыя души Твоея мир скорбный озаряющая. Радуйся, Царице небесе и земли, в безконечныя веки царствующая; Радуйся, всем нам Мати Вселюбимая и Всемилостивая. Радуйся, Благодатная, Господь с Тобою, Ты же с нами, чудным образом милость Божию знаменающая.

Кондак 13
О, Пресвятая Владычице, Дево Богородице, Мати Господа нашего! К Тебе припадаем и молим Тя: помилуй и спаси нас, недостойных Твоего милосердия. Услыши нас, Пречистая, не ввери нас человеческому предстательству, но Сама помилуй нас к жизни сей, и в будущем веце соделай нас наследниками Небеснаго Царствия; яви нам Знамение милости Твоея, да прославим безмерное милосердие Твое и Богу воспоем Херувимскую песнь: Аллилуиа.

(Этот кондак читается трижды, затем икос 1 и кондак 1)

Молитва
О, Пресвятая Владычице Бого­родице, Небеснаго Царя Мати, Богоизбранная Отроковице! Не­надежных надеяние, больных ис­целение, сирым предстательнице, скорбящим утешение и радость, обидимым покровительнице и всем в бедах и напастях сущим скорое поможение и заступление! Помози, о Мати Божия, и нам грешным в скорби нашей, возвесели радостию сердца лю­дей Твоих; управи в мире и тишине жизнь нашу и не даждь во отчаяние впасти. Ты бо Едина еси паче всех святых и паче всех Горних умов Предстательница наша к Богу, яко Всеблагаго Царя Благая Мати. Темже мы, грешнии, на Пречистый Твой образ «Знамения» взирающе, умиленно преклоняем колена и, благоговейно лобызающе, молим Тя, Благосердая Мати: не отрини смиреннаго моления нашего и яви нам знамение милости Твоея: никтоже бо, к Тебе прибегая со упованием, исходит от Тебе по­срамлен, но просит благодати и приемлет дар к полезному про­шению, прославляя Сына Твоего и Бога, и Тебе с Ним, во веки веков. Аминь.

Акафист Пресвятой Богородице перед Ея иконой, именуемой «Знамение» Курская-Коренная

Акафисты


Кондак 1
Взбранной Воеводе и благой Одигитрии, путеводящей нас к Небесному Граду, приидите, припадем вси, града зде пребывающего не имущии, Тоя всесильнаго заступления просяще, чудеса же, от лет древних даже доныне от иконы Ея бываемыя, поминающе, велегласно возопиим: Радуйся, Владычице, знамения милости Твоея миру присно являющая.

Икос 1
Ангели удивишася, зряще Тя, Владычице, иконою Твоею, яко столпом огненным, нам предходящую в великом исходе нашем из земли, беззаконники порабощенныя. Не Моисея бо, но Самую Тя имамы Путеводительницу в скорбном странствовании нашем, темже Ти благодарне зовем: Радуйся, благословенная Одигитрие; Радуйся, истиннаго Пути Мати. Радуйся, сквозь пустыню мира сего нас провождающая; Радуйся, Амалика мысленнаго преславно побеждающая. Радуйся, источники благодати от иконы Твоея источающая; Радуйся, закон Сына Твоего, Христа Бога нашего, на скрижалех сердец наших написующая. Радуйся, зноем страстей палимых благодатное окропление; Радуйся, изнемогающих всемощное укрепление. Радуйся, сердец смятенных тишайшая усладо; Радуйся, странных и сирых Божественная отрадо. Радуйся, землю обетованную нам приуготовляющая; Радуйся, небеснаго Иерусалима врата нам отверзающая. Радуйся, Владычице, знамения милости Твоея миру присно являющая.

Кондак 2
Видехом, видехом выну чудеса и знамения Твоя, Владычице, исповедуем милость, не таим благодеяний Твоих, обаче велегласно вопием: Аллилуиа.

Икос 2
Разум Божий кто постиже и тайну судеб Его кто повесть? Возводит бо и низводит, смиряет и возносит, поражает и исцеляет, и кто бысть советник Ему? Темже и нас, грех наших ради, смири и царство наше низложи, сыны наша по всему лицу земли разсеяв. К кому убо прибегнем в скорби нашей, к кому руце прострем, аще не к Тебе, Всеблагая. Обаче сердцем сокрушенным вопием Ти таковая: Радуйся, Сына Твоего за нас умоляющая; Радуйся, праведный гнев Божий утоляющая. Радуйся, беззаконий наших очищение; Радуйся, грешным Ходатаице прощения. Радуйся, светильник упования немеркнущий нам возжегшая; Радуйся, во исходе и странствовании нашем иконою Твоею нам предтекшая. Радуйся, вся разсеянныя воедино собирающая; Радуйся, омофором Твоим светообразным вся покрывающая. Радуйся, раздоры и нестроения умиряющая; Радуйся, советы нечестивых разоряющая. Радуйся, плавающих в житейском море окормляющая; Радуйся, попечением Твоим ни единаго же оставляющая. Радуйся, Владычице, знамения милости Твоея миру присно являющая.

Кондак 3
Силы Тобою деются и благодать от честныя иконы Твоея неоскудно изливается, Преблагословенная Дево, вся подвизая о Тебе вопити: Аллилуиа.

Икос 3
Имущи милосердие неизреченное, тамо благодать Твою возсияваеши, Всеблагая, идеже тьма огустевает и скорби приумножаются, темже не оставила еси нас сирых, обаче во иконе Твоей к нам убогим пришла еси, славящим Твое снисхождение и вопиющим сице: Радуйся, чудес море; Радуйся, милости пучино. Радуйся, благодати приснотекущий источниче; Радуйся, исцелений кладезю неисчерпаемый. Радуйся, естества уставы победшая; Радуйся, законы естественныя пременившая. Радуйся, скорби наша на радость прелагающая; Радуйся, плач и стенание в веселие духовное претворяющая. Радуйся, озлобления и беды на пользу нам обращающая; Радуйся, враги наша преславно смиряющая. Радуйся, чаяния врагов посрамляющая; Радуйся, поющия Тя возвеселяющая. Радуйся, Владычице, знамения милости Твоея миру присно являющая.

Кондак 4
Бури искушений, на нас находящей, скорбям же и болезням, нас посещающим, егда терпению в нас оскудевати и духу нашему смущатися, притецем ко образу Пречистыя Девы и слезы точаще Той, от сердца возопиим: Богоноснеи руце Твои нам простирающи, из глубины зол возведи ны, яко да благодарными усты зовем: Аллилуиа.

Икос 4
Слышаху древле людие российстии слух явления святаго Твоего образа в дубраве Курстей и текше к нему со тщанием, умильно взываху: «Откуду нам сие, да прииде к нам Мати Господа нашего», узрев же икону Твою, Владычице, при корене древеснем лежащую, и приемше ю, яко сокровище великое, возопиша Тебе, Первообразней: Радуйся, раю светлейший, древо Жизни израстивший; Радуйся, вертограде Божественный, древо Церкви прозябший. Радуйся, Цвете благовонный, мир весь облагоухаяй; Радуйся, крине непорочный, вселенную украшаяй. Радуйся, лозо благоплодная, вином умиления всех напоившая; Радуйся, розго освященная, плоды сладостными род человеческий напитавшая. Радуйся, кореню домостроительства Божия; Радуйся, спасения нашего верх и главизно. Радуйся, злыя наши страсти из корене посекающая; Радуйся, добродетелей сад насаждающая. Радуйся, добрые обычаи в нас вкореняющая; Радуйся, причастники райския жизни быти нас сподобляющая. Радуйся, Владычице, знамения милости Твоея миру присно являющая.

Кондак 5
Боготочней звезде подобящеся, икона Твоя честная, Госпоже, землю Русскую и грады ея обтекаше, царие сей благоговейно поклоняхуся, царицы любовию ту благоукрашаху, архиереи страхом сретаху, верных же множества, духовно торжествующе, вопияху: Аллилуиа.

Икос 5
Видяще безбожников безумный совет икону Твою, Пречистая, разорити, от Тебе, Дево, посрамленный, и обретше образ Твой святый, от всякаго действа сокрушительна невредим, монаси и мирстии страхом и любовию возопиша Ти сицевая: Радуйся, крепосте несокрушимая; Радуйся, стено нерушимая. Радуйся, лютых безбожников совет посрамившая; Радуйся, чаяния врагов осуетившая. Радуйся, хулителей уста заградившая; Радуйся, икону Твою святую невредимо сохраншая. Радуйся, от руки злодейской сия соблюдшая; Радуйся, очи Твои от скверных дел человеческих обращающая. Радуйся, лица Твоего Пречистаго от нас, убогих, не отвращающая; Радуйся, из руки диаволи грешныя исхищающая. Радуйся, прощение кающимся возсиявающая; Радуйся, двери милосердия Божия ходатайством Твоим отверзающая. Радуйся, Владычице, знамения милости Твоея миру присно являющая.

Кондак 6
Проповедует мир весь милости, от иконы Твоея изливаемыя, Всецарице! Отнелиже бо изшла еси тою из земли Русския, несть град, ниже весь, в них же не бе являема сила Твоя. Тем же от всех язык спасении и Тобою вопиют благодарно Богу: Аллилуиа.

Икос 6
Возсияй нам паки свет упования, Богородице Пречистая, зарю спасения миру возвестившая во Твоем рождестве. Не предаждь нас до конца в руце врагов наших и советы нечестивых и лютых отступников скоро разори. Да будет и страна наша Российская, якоже древле дом Твой, да процветет в ней благочестие, святыя обители и храмы да благоукрасятся, людие же, от лютых безбожников избавльшеся, да торжествуют с веселием, славяще Твое заступление и зовуще Ти таковая: Радуйся, любовию Твоею всему миру возсиявшая; Радуйся, из уст Божественных Сына Твоего всыновление рода человеческаго приявшая. Радуйся, Мати Божия и Мати христианом; Радуйся, недугов отъятие и Целительнице раном. Радуйся, в темницах сущих незаходимый Свете; Радуйся, узников отрадо и пространство клетей. Радуйся, за правду гонимых дерзновение; Радуйся, за веру страждущих тернение. Радуйся, мучеников венчание; Радуйся, мучителей грозное воздаяние. Радуйся, связнем узы разрешающая; Радуйся, телом и душою плененных свобождающая. Радуйся, Владычице, знамения милости Твоея миру присно являющая.

Кондак 7
Хотящу праведному Судии и Богу человеки, Того забывающия, вразумити, попусти бранем велиим на земли воздвигнутися. Языцы бо смятошася и царства поколебашася. Смерть и ужас по лицу земли пройдоша, плач и стенание воздух огласи. Тогда убо вси, иже на Тя упование возложиша, Богородице, ко образу Твоему усердно притекаху и, от Тебе единыя спасения чающе, Богу, давшему Тя людем Заступницу, вопияху: Аллилуиа.

Икос 7
Новые знамения и чудеса велия явила еси от иконы Твоея честныя, Богомати, егда услышахом глас брани. Градом бо горящим и земли трясущейся, чертогом разрушаемым и пругом воздух исполняющим, соблюла еси церковь, в ней же образ Твой, Всецарице, пребываше, невредиму: вси же в ней молящиися, чудо видяще, едиными усты возопиша Ти таковая: Радуйся, Державная Воеводо; Радуйся, на Нюже уповают вси народи. Радуйся, Церкве Столп и Утверждение; Радуйся, всякия святыни защито и ограждение. Радуйся, победо, мир побеждающая; Радуйся, и не имущия упования спасающая. Радуйся, благая Послушательнице молений прилежных; Радуйся, безпомощных помоще и надеждо ненадежных. Радуйся, сатану под нозе наша сокрушающая; Радуйся, огню и стихиям повелевающая. Радуйся, иконою Твоею нас остеняющая; Радуйся, Покровом Твоим нас осеняющая. Радуйся, Владычице, знамения милости Твоея миру присно являющая.

Кондак 8
Странное и страшное знамение явила еси, Всесвятая, егда домом разрушаемым, храмину малую, юже освятила еси прежде иконы Твоея пребыванием, сохранила еси невредиму, старицу же и сына ея, в той крыющихся, целых представила еси. Тем же вси, зрящии и слышащии сия, ужасахуся ужасом, страхом вопиюще: Аллилуиа.

Икос 8
Весь мир любовию Твоею Богоподобною объемлеши, Приснодево, ближняя и дальняя посещающи и всю поднебесную во иконе Твоей приснопоклоняемей обтекающи. Тем же от восток даже до запад шествие Твое бысть, да вси невозбранно к той припадают, Тебе же Первообразней припевают сицевая: Радуйся, всех радостей Радосте; Радуйся, Чаше неупиваемая сладости. Радуйся, нынешняго века скорбнаго утешение; Радуйся, будущия жизни наслаждение. Радуйся, веселящихся на небеси нас ради оставляющая; Радуйся, к земли многоскорбней и многобедствующей приникающая. Радуйся, со иконою Твоею благодатными стопы невидимо в домы наша входящая; Радуйся, благословение и радование тем приносящая. Радуйся, келлии монашеския образом Твоим честным освящающая; Радуйся, клети убогия паче палат царских тем украшающая. Радуйся, храмы Божии Ликом Твоим Пресвятым облистающая; Радуйся, в жилищах чтущих Тя незримо пребывающая. Радуйся, Владычице, знамения милости Твоея миру присно являющая.

Кондак 9
Всяк возраст и всяк чин притекает к Тебе, Богоневесто Владычице, всем бо простерты суть Богоноснеи Твои руце, всем вся подаеши независтно, вся светлиши и утешаеши, Всецарице. Темже, о Тебе веселящеся, вопием Богу: Аллилуиа.

Икос 9
Вития многовещанныя увядоша и ритори благоглаголивии изнемогоша, по долгу Тя прославити хотящии, Марие Богородице, недоумеет бо всяк ум благохвалити Тя по достоянию, обаче аще мы умолкнем — камение возопиют. Темже, аще и недостойнии суще, бренными усты дерзаем взывати Ти таковая: Радуйся, пророков огнедохновенный глагол; Радуйся, апостолов проповедь неумолкаемая. Радуйся, преподобных сердечное пение; Радуйся, исповедников крепосте и дерзновение. Радуйся, молчальников тайнолепная беседо; Радуйся, риторов и Богопроповедников Златыя уста. Радуйся, на страсти подвизающихся превознесенная наградо; Радуйся, всех праведников Божественная отрадо. Радуйся, матерей славо и девства похвало; Радуйся, старцев покой и юных Водительнице. Радуйся, Адама смертнаго дщи, Богу же Родительнице; Радуйся, славою неизреченною близ Бога сияющая. Радуйся, Владычице, знамения милости Твоея миру присно являющая.

Кондак 10
Спастися миру тепле помолися, Богородице, помощи бо Твоея требует, сетям лукаваго, по всему лицу земли распростертым, языком же шатающимся, и бурям напастей, на Церковь Божию воздвизаемым; тем же, яко же в Кане Галилейстей иногда, рцы слово к Сыну Твоему и Богу, да воду искушений же и скорбей в вино умиления и веселия Божественнаго претворит, да поем Ему выну: Аллилуиа.

Икос 10
Стена необорима нам буди, Всенепорочная, сопротив ополчений видимых и невидимых враг, державно по нас поборающи, любовию вопиющих Ти таковая: Радуйся, Богоноснеи руце Твои о нас к Богу присно воздвизающая; Радуйся, духов злобы под нозе наша покоряющая. Радуйся, князя тьмы хитросплетенные советы посрамляющая; Радуйся, тучи помыслов Духом Божиим развевающая. Радуйся, уныние от нас отгоняющая; Радуйся, треволнения житейския смиряющая. Радуйся, бурем напастей повелевающая; Радуйся, обуреваемым благодатно окормляющая. Радуйся, из глубины зол извлачающая; Радуйся, погибающим длани милостивно простирающая. Радуйся, нози наша на пути спасения наставляющая; Радуйся, руце наша во бранех укрепляющая. Радуйся, Владычице, знамения милости Твоея миру присно являющая.

Кондак 11
Пения наша, якоже Сын Твой вдовичу лепту, приими, Всесвятая, и подаждь нам всегда Тебе сия приносити, живот наш в мире управляющи и грехом прощение дарующи, яко да в небесныя обители вшедше, воскликнем Богу: Аллилуиа.

Икос 11
Светообразный омофор Твой, Всеблагая, над землею нашею невидимо простри, нечестия безлунную ночь прогоняющи, зарю же пакибытия возсиявающи, да в радости немолчно зовем: Радуйся, воистину в Солнце облеченная; Радуйся, венцем от звезд увязенная. Радуйся, рясны златыми преиспещренная; Радуйся, красото неизреченная. Радуйся, Светлосте, денницы светлейшая; Радуйся, теплото, солнца любезнейшая. Радуйся, зарнице будущаго века; Радуйся, Свете невечерний ангелов и человеков. Радуйся, темныя демонския полки далече отгоняющая; Радуйся, неверия тьму просвещающая. Радуйся, во оружия света нас облекающая; Радуйся, Святыне, цветы всех добродетелей благоухающая. Радуйся, Владычице, знамения милости Твоея миру присно являющая.

Кондак 12
Благодать возблагодать от иконы Твоея прияхом, Богородице Пречистая. Никтоже бо притекаяй к той с верою тощь отходит, но кийждо по потребе своей дар Божественный приемлет и радостию венчается, вопия к Богу: Аллилуиа.

Икос 12
Поем Тя, величаем Тя, поклоняем Ти ся, Госпоже Пречистая, сытости похвал Твоих отнюдь не знающе, и припадающи пред честным Твоим образом, умильно взываем Ти сице: Радуйся, душ наших сладчайшая весно; Радуйся, сердец наших светлейшее утро. Радуйся, высото недомышляемая; Радуйся, славо неувядаемая. Радуйся, блаженство нескончаемое; Радуйся, благосте неизсякаемая. Радуйся, веселие неизреченное; Радуйся, воистину едина Преблагословенная. Радуйся, превыше всей твари Превознесенная; Радуйся, в житии сем нас заступающая. Радуйся, в час смертный верныя сретающая; Радуйся, яко и на Страшном Судищи спасаеши на Тя уповающия. Радуйся, Владычице, знамения милости Твоея миру присно являющая.

Кондак 13
О, Всепетая Мати и Мати всем Христианом, Сына Твоего и Бога любовию подражающи, вопиеши к нам милостивно: не бойся, малое стадо, Аз есмь с нами и никтоже на вы! Темже Ти любовию припадающе и со слезами благодаряще, велегласно зовем: Аллилуиа.

(Этот кондак читается трижды, затем икос 1 и кондак 1)

Молитва
Царице наша Преблагая, надеждо наша, Богородице, Приятелище сирых и странных Предстательнице, скорбящих Радосте, обидимых Покровительнице, зриши нашу беду, зриши нашу скорбь; помози нам, яко немощным, окорми нас, яко странных, обиду нашу веси, разреши ту, яко волиши, избави отечество наше, страждущую землю Российскую, от лютаго безбожников обстояния, спаси и сохрани рабы Твоя (имя рек) и всех нас, зде предстоящих и молящихся, и покрый нас от всякаго зла честным Твоим омофором, яко не имамы иныя помощи разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши нас и покрыеши во веки веков. Аминь.